sábado, 23 de marzo de 2019

ACTIVANDO A CONTA ATRÁS PARA O DESCENSO DO BELELLE

Chegou o sábado e activamos a conta atrás a dúas semanas para a celebración do Descenso do Belelle...

 
...seguimos gozando deste tempo anticiclónico que facilita as tarefas do equipo que está a revisar o sendeiro...

 
A primavera entra despois deste inverno seco, pero xa sabedes que até que se vaia achegando o día non teremos unha idea de que día vamos atopar... será un abril de augas mil?

 Camiño da Fervenza, aproveitando para facer unha parada e desfrutar da tranquilidade do lugar...
 ...xa vedes que o salto que comparten Neda e Fene leva a auga xusta para seguir sendo todo un espectáculo natural, entre os raiolos do sol...
 ...aínda dá para mollar os pés no río... pero só os pés!
...na central eléctrica da Fervenza están a amañar os balaustrés da ponte pequena, poderemos estrealos para o día da marcha?...
 ...no lugar do Roxal, remanso de paz...
...camiño de Maciñeira, máis do mesmo... e non hai queixa! :-)
...mañá seguimos con máis detalles e curiosidades mentres preparamos o descenso para que teñades a mellor experiencia posible neste espazo natural tan acolledor... e ti que podes facer? pois polo pronto, se pensas vir, podes inscribirte xa para non deixar aos nosos compañeiros da Secretaría atarefados cos papeleos e os seguros até o último día; e se queres vir con outr@s, tamén podes axudarnos compartindo a ligazón do noso blog e o cartel do Descenso do Belelle nas túas redes sociais!


DE MUÍÑO A MUÍÑO

Hoxe os nosos compañeiros Fonso e Xandre proseguiron no percorrido da sinalización do roteiro para que o vindeiro 6 de abril teñades a mellor experiencia camiñando polas beiras do río Belelle...

 
...ademáis de repasar as marcas esvaídas polo paso do tempo e a climatoloxía, tamén estudan as condicións da senda fluvial e dos pasos sobre o río...

 ...e tamén o estado dos lugares de interese etnográfica que atoparedes polo camiño, como os muíños que dan conta da intensa actividade que o río supuña até non hai tanto con todo tipo de aproveitamentos... aquí tendes o Muíño do Barreiro, onde ademáis da nosa marcha, conflúen varios roteiros sinalizados... lembrade que o noso é sempre o das marcas brancas e azuis...
 ...outra das teimas que temos é o respecto pola contorna, non deixa de ser lamentable atopar restos de lixo, a senrazón das persoas que van a gozar dun espazo natural para a continuación degradalo con estes actos de incivismo...
 ...hoxe chegamos até o merendeiro do Río Cuberto... e xa queda un día menos para o XIV Descenso a Pé do Río Belelle... e ti? xa sabes con quen vas vir?



xoves, 21 de marzo de 2019

XA ESTAMOS MANS Á OBRA!!!

os compañeir@s xa están a traballar, coa pintura o esprai e a caixa de ferramentas, na revisión da sinalización do percorrido do Descenso a Pé do Río Belelle.

Sabedes que a andaina é lineal, a meirande parte dela pegada á canle fluvial e co río á vista, e cando non está á vista é doado escoitar o son da auga baixando... ademais sempre tedes a guía das frechas azul e branca; o doble punto das mesmas cores; ou os carteis azuis co emblema da ruta...

As persoas que están a facer o traballo de campo na revisión das marcas enviaron estas fotos para que vos vaiades poñendo en sintonía coa marcha, xa desde a saída no Gallel (As Pontes) ascendemos até o punto máis alto do roteiro, e un dos máis altos da zona -con permiso do Caxado- así apenas iniciada a marcha e se o día acompaña podemos desfrutar de fermosas vistas nos 360º desde o vértice xeodésico e as antenas do Fontardión (665 m).
 ...Comezamos a descender, aínda dentro do Parque Natural das Fragas do Eume, pola Serra do Forgoselo, e abandoamos o concello de As Pontes de García Rodríguez para adentrarnos no concello de A Capela entre maxestosos bolos graníticos...
 Camiño da Ponte de Porcar envíannos esta foto que dá idea da auga que leva o río nesta altura do ano... veremos a ver que tempo dán daquí en 15 días...
 ...e por hoxe de momento é todo, con este bonito solpor desde algún lugar de A Capela despedímonos por hoxe! Non deixes a inscrición para o derradeiro día, vémonos o 6 de abril no XIV Descenso a Pé do Río Belelle!

martes, 12 de marzo de 2019

IMOS A POLO PENÚLTIMO DESCENSO A PÉ DO RÍO BELELLE

Un ano máis, e con este xa van catorce, convidámosvos a participar no Descenso a Pé do Río Belelle, un roteiro lineal seguindo o curso do río Belelle desde os seus nascentes na Serra do Forgoselo, até a súa desembocadura no mar na ría de Ferrol.
Son catro os concellos que andaremos: As Pontes, A Capela, Fene e Neda. Desde logo non é a andaina máis dura -tampouco a máis doada-, pero a beleza das paisaxes que atravesaremos, a meirande parte das veces dándolle ás costas ao avance da "civilización" pagan moito a pena,  con recunchos pouco coñecidos e inesquecibles...
Tes até o 1 de abril para inscribirte. É moi importante que cumprades todos os requisitos de datos e documentación para tomar parte da andaina, por mor da xestión de seguros, avituallamentos, etc.
Tede en conta que esta será a penúltima ocasión para desfrutar deste roteiro que abrimos en 2006. Está decidido pechar esta etapa como fixemos tamén cos míticos 50km Ferrol-Teixido a pé, trala celebración de XV edicións.
Así que xa estades avisad@s! ...correde a voz e a inscribirse!

>>> CONDICIÓNS E INSCRICIÓN 2019 <<<

 


mércores, 25 de abril de 2018

ASI FALANDO COA XENTE .....

.....  E DENDE O CLUBE ESTAMOS ASI DE CONTENTOS!
E non deixes de ver as fotos do Descenso do Belelle 2018 aquí e aquí

luns, 23 de abril de 2018

XENTE DE POUCA FE!!! NON SEMPRE CHOVE NO BELELLE!!!

O 2018, pasará a historia como ó mellor día dos 13 que levamos con esta marcha.
Notouse na chegada, que se acelerou todo dun xeito, increíble, cecais algo de temperatura de mais, ceos despexados, auga no río.. moita, firme en bo estado.
Grazas a todos por camiñar connosco un ano máis (ollo quedan 2!!) e nestes links podes ver as fotos: fotos 2018 (I) e fotos 2018 (II)

mércores, 18 de abril de 2018

OLLO AOS PASAMÁNS

O malo destas instalacións feitas pola administración é que unha vez feitas non se manteñen, así que ollo!!



IMPRESIONANTE O RIO

 Ainda estivemos onte pola zona, augas claras..moita auga, camiños secos.. este ano ¿triunfaremos?

martes, 17 de abril de 2018

EN VISTA DO BO TEMPO...AMPLIAMOS A INSCRICIÓN


ESTE ANO HAI QUE GOZAR O BELELLE A PÉ!!!
O río Belelle baixa cheo de auga, a Fervenza está esplendorosa, os sendeiros co terreo seco tal e como vai esta semana, e as predicións meteorolóxicas dan bo tempo para o sábado... que máis podemos pedir!
Superamos as 100 inscricións pero ampliamos o prazo até o mercores 18 aínda estás en tempo!

domingo, 15 de abril de 2018

ENRÓLATE NA AVENTURA DO BELELLE A PÉ

Así estaba o Belelle o sábado na súa desembocadura na ría de Ferrol. Este ano incluimos o enlace co paseo polas marismas e a pasarela peonil para achegarnos a San Nicolás de Neda. Que mellor final para este magnífico roteiro que percorre un río enteiro ao longo de case 30 quilómetros desde os seus nacentes na Serra do Forgoselo.

Estamos nos últimos días de inscrición, se queres unirte non o penses moito máis e enrólate con nós nesta aventura! formulario de inscrición

xoves, 12 de abril de 2018

BELELLE, CORRENTE DE IDEAS

Cando bautizamos o noso Descenso do Belelle como "Corrente de Ideas" é por cousas como esta. Grazas! 💚
"O outro día fixemos o último tramo cos alumnos do IES Castro da Uz e fixemos este 🎥 vídeo que nos quedou chulo. Espero que vos guste y si queredes difundilo non hai problema. Un saudo e grazas polo voso traballo"

BELELLE A VISTA DE PAXARO

Que sucede cando mesturas datos GPS da actividade humana con datos GIS nunha visualización 3D? @davidcouce danos a resposta. Apaixoante seguir os 30 km do noso descenso do Belelle... a que dan ganas! pois ide entrenando para o 21 de abril 😉

POR QUE HAI QUE VIR AO DESCENSO DO BELELLE?

Recordos do Descenso do Belelle

Sempre temos un detalle/agasallo cos camiñantes que participades no Descenso do río Belelle. Últimamente temos moito éxito cos antiestrés de gomaescuma para apertar coa man e "liberar tensións". Algún ano tamén caeu un premonitorio paraugas que tamén foi ben recibido e que aínda vemos de cando en vez por aí...
Pero sen dúbida os parches téxtiles, decorados sempre con elementos do río Belelle como a Fervenza ou os muíños, son un dos recordos máis lembrados e poñibles en mochilas, prendas de vestir, e nos sitios máis insospeitados...

E ti onde tes estes parches? mándanos unha foto ou compártea con nós en facebook/twitter/instagram citando @cmferrol

martes, 10 de abril de 2018

A FERVENZA, ESPLENDOROSA

Con todo o que choveu estes días a Fervenza do río Belelle amosa toda a súa grandeza natural como podedes ver nestes vídeos que gravou hoxe o noso compañeiro Emilio.
O salto da Fervenza, de 45 metros de altura, é unha das grandes atraccións naturais da nosa comarca, compartida polos concellos de Neda e Fene.
Para nós é un punto especialmente emocionante no percorrido do Descenso do Belelle, pois acadando case os 25 km de andaina ás costas, o paso pola Fervenza entre Viladonelle e Marraxón, presaxia a cercanía do final do roteiro na vila de Neda.

Se aínda non o fixeches, inscríbete no XIII Descenso do Belelle e comparte esta información nas túas redes sociais.

mércores, 4 de abril de 2018

COMEZAMOS UNHA NOVA AVENTURA

Este ano, auga non vai faltar. Aínda non puidemos ir un so día a revisar o camiño.

É posible que se fora todo o camiño até a desembocadura?  Xa veremos!!

Temos programado un cambio no final, para aproveitar a pasarela sobre a ría e a ponte dos Subarrieiros.

E cabe a posibilidade que..sexa o penúltimo ano!!!

mércores, 5 de abril de 2017

BELELLE, DE NOVO TODO BEN

Incluso pouco choveu, o día perfecto, so 3 participantes retirados dos 121 que tomaron a saída en Goente... e ollo que xa estamos a colgar as fotos no blog!! Agora a pensar nos 50km da Costa Artabra

BÚSCATE NAS FOTOS

Participaches no XII Descenso do Belelle? Xa podes buscarte nas fotos!
http://belelleape.blogspot.com.es/p/fotos-2017.html

luns, 3 de abril de 2017

ESTIVECHES NO BELELLE? COMPARTE AS TÚAS IMPRESIÓNS!

Xa pasou o día e de seguro que estades a agardar pola galería de fotos, namentras as subimos podedes ler un breve resumo deste fermoso día en Radiofusión Fene.

Tamén temos este vídeo que envía Juan Seoane López, mesmo deulles tempo a facer o making-of...

Vése que a nosa Corrente de ideas tamén fomenta a creatividade. Se participaches, comparte os teus comentarios, fotos, vídeos, etc. sobre o Descenso do Belelle neste mesmo blog, por mail, ou en calquera das redes sociais nas que temos presenza en Twitter ou Facebook


venres, 31 de marzo de 2017

127 INSCRITOS, 26 FEDERADOS DE 7 CLUBES DE GALICIA

Cunha predición meteorolóxica favorable, os bocatas de ENPANES, a bebida cedida moita polo EROSKI-Neda, as laranxas recén chegadas de Alacante dos nosos amigos de Taronges de la Caseta, 3 buses de Autos Paco listos,  todo en firme.

A ver se desfrutamos dun día decente e o pasamos todos ben. Un percorrido pola beira do Belelle, ben o merece, cun pincho final do Concello de  Neda. Agardámosvos mañá!



martes, 28 de marzo de 2017

ANDAR UN RÍO ENTEIRO

Cantas veces podes dar o luxo de andar un río enteiro nun día, desde o seu nacedoiro ata que morre no  mar da ría de Ferrol 30 quilómetros máis abaixo?


O Descenso do Belelle é para nós a «Corrente de ideas» porque percorrer un río é percorrer unha vida enteira. Por unhas horas podes fuxir do tráfico, do ruído, das redes sociais e facer esta viaxe ao centro do noso corazón natural polos concellos de As Pontes, A Capela, Fene e Neda.



Quedan horas para pechar a inscrición, se aínda non o fixeches anímate, porque nunca esquecerás esta experiencia!

xoves, 23 de marzo de 2017

PENA LOBEIRA

Nada mais arrancar, o Fontardión (o mellor cara o leste, vemos os Ancares ainda nevados), e as configuración batolíticas de Pena Lobeira, O Val de As Pontes no fondo e todo o noroeste.
 




xoves, 16 de marzo de 2017

EXCESO DE SINALIZACON

Esta o GR55 (Betanzos - Teixido) que interfire un tramo con río na zona de Formariz, realmente empeza a estar un pouco "guarro " de pintura este tramo
 



MANUEL MEIZOSO O ALCALDE DA CAPELA

O atopamos revisando o estado do sendeiro no río na zona de Cabalar: Certifica que está perfecto (e é certo)


xoves, 9 de marzo de 2017

"CANAL" DO BELELLE

Esa empresa que se din galega, e que como moitas farda de "medioambientalismo" e que nos mete uns clavos nos recibos ainda inexplicados (no noso local nestes meses foi dun atraco, con alevosía, e sen nocturnidade pois o fan a luz do día e coa complicidade dos diferentes gobernos), faría un estudo de impacto ambiental do peche do Canle, que ainda non sabemos ben que pretende, aparte de converter nunha trampa mortal para os animais o propia canle, pero o que si é certo e que a vai posta é un auténtnico atentado visual nunha das fragas más autenticas da nosa bisbarra...pero ainda así o Belelle segue a ser un marco de impresión..o veredes!