domingo, 1 de maio de 2022

A ULTIMA XA FOI!

 

Para variar tivemos un día realmente espectacular, soleado e case de verán! Grazas a todas as persoas que vos animáchedes a participar, nesta e nas catorce edicións precedentes do Belelle a pé, a nosa "Corrente de ideas".

Nos vindeiros días iremos publicando máis fotiños e detalles deste marabilloso día, agardando que o pasarades igual de ben gozando do camiño á beira do río.

Agardamos tamén os vosos comentarios, son moi benvidos, podedes facelo acó no blog, no mail do club ou nas nosas redes sociais. Agradecidos sempre! Vémonos no Belelle!

AHORA BEN..estaría ben saber  quen marca rutas e deixa todo cheo de merda, falsos amigos da natureza:





xoves, 21 de abril de 2022

Coidando o camiño

 


Despois de tres anos de ausencia obrigada pola pandemia, desde a edición de 2019, había que empregarse a fondo coa marcado azul e branco e coa inspección do sendeiro do Belelle. Da parte alta do río, desde a saída en Fontardión até a metade do percorrido en Formariz, encargáronse os nosos compañeiros Andrés e Fonso, que se aseguraron de que o camiño estea nas mellores condicións para andalo o día 30 e o que dure!




 





mércores, 20 de abril de 2022

Queres ir á última?

Queres ir á última? Xa non é só unha cuestión de estilo 😅 se queres ir á última do Descenso do Belelle podes inscribirte, e se queres ir á última en moda primavera-verán, nada como a camiseta conmemorativa para pechar o ciclo dos 15+2 anos do Belelle... molona a que si?



luns, 18 de abril de 2022

A Fervenza do Belelle a vista de paxaro

 

Quedan apenas 12 días para a andaina! Dos moitos engados naturais e paisaxísticos do sendeiro do río Belelle, o salto da Fervenza, que atoparemos cando xa levamos arredor de 20 km nas pernas, é sen dúbida o máis emblemático. Con arredor de 45 metros de altura, non se trata dun único salto, senón de ata tres, aínda que os dous máis cativos apenas vense desde o pé da Fervenza. Mais desde os miradoiros de Marraxón e Viladonelle temos boas vistas... ou coma neste caso co vídeo que trae o noso compañeiro Alfonso Manso e o seu pequeno "mosquito" electrónico, que gravou estas refrescantes imaxes a vista de paxaro.

Se queredes saber máis sobre as posibilidades desta zona para deportes como o barranquismo ou o kaiak non perdades detalle destes vídeos:



martes, 29 de marzo de 2022

DESTA VAI! COMEZAMOS AS INSCRICIÓNS PARA A EDICIÓN 2022

SERÁ O SÁBADO 30 DE ABRIL

Levamos dous anos adiando (pola pandemia) a que queriamos que fora a derradeira edición do Descenso a pé do río Belelle neste formato.

Será a decimoquinta edición desde o ano 2006. A partir deste ano seguiremos a camiñar as beiras do noso Belelle, pero será como unha actividade máis no noso calendario anual de actividades

A estas alturas xa estamos a revisar o camiño desde O Gallel en As Pontes até San Nicolás de Neda. Como vos podedes figurar, desde 2019 van xa máis de dous anos sen limpar nen sinalizar... está case como na primeira edición...

Esta derradeira edición do Descenso do Belelle será tamén a máis tardía, adoitabamos facela o segundo sábado de abril, sempre dependendo dos días festivos pola Semana Santa... este ano o 23 quedaba moi perto, así que finalmente quedamos o sábado 30 de abril. Vemonos no Belelle... e aquí tes o formulario de inscrición...

sábado, 13 de abril de 2019

BELELLE POLO RETROVISOR

https://belelleape.blogspot.com/p/fotos-2019.html

Pois xa pasou unha semana enteira desde o XIV Descenso a pé do Río Belelle, o que quere dicir tamén que quedan só 51 semanas para a decimoquinta edición.

Aproveitamos a ocasión para completar o álbum de fotos, se o outro día publicamos as fotos do noso compañeiro Alfonso desde o corazón da ruta, hoxe completamos o libro de recordos coas imaxes do noso presi Xan Ramírez e do compañeiro Xoán Porto, aos que fúchedes atopando a contramarcha polos distintos tramos do sendeiro.

Desfrutade do sábado, agardamos que as imaxes perduren no voso recordo, Saúdos desde o Belelle!

VER O ÁLBUM DO BELELLE A PÉ 2019

mércores, 10 de abril de 2019

MÁIS FOTOS DO DESCENSO DO BELELLE

Xa estamos a publicar as galerías de fotos do XIV Descenso do Belelle, nesta ligazón tedes as fotos do noso compañeiro Alfonso Manso, que ía no grupo de peche do primeiro tramo entre O Gallel e o avituallamento de Porcar, e logo xa integrado na marcha até Neda.

Pero tamén traemos as vosas colaboracións, das que estamos superencantad@s de recibir e difundir. Aquí tedes o descenso do Belelle na mirada de Ángeles Gabeiras, que participou na andaina e tivo a amabilidade de compartir o seu álbum en Flickr para que o desfrutemos tod@s. GRAZAS!


AXIÑA MÁIS FOTOS.... E SEGUIMOS A AGARDAR POLOS VOSOS COMENTARIOS E VALORACIÓNS SOBRE A RUTA!

https://flic.kr/s/aHsmbndrDD

domingo, 7 de abril de 2019

O QUE QUEDOU DO DÍA...



Pois pasou o día, pasou a romaría como di o dito popular. Onte cumprimos a nosa cita anual co río Belelle, e van xa 14 anos actualizando este fermoso roteiro fluvial. O tempo portouse como mandaban as predicións, chuvascos a primeira hora e sobre todo a partires das 14 horas, e polo medio... sol e nubes e a desfrutar, a pesar da molleira, desta contorna espectacular e dunha primavera, agora si, tipicamente galega


Axiña habemos colocar todas as fotografías neste blog, estade atent@s ás novidades para buscarvos nas fotos,,,

SE PARTICIPACHES NO DESCENSO DO BELELLE, POR FAVOR COMENTA AS TÚAS IMPRESIÓNS NUN COMENTARIO ABAIXO DESTE ÁLBUM. FAINOS MOITA ILUSIÓN ESCOITARVOS!!! GRAZAS E ATÉ O ANO QUE VÉN!









xoves, 4 de abril de 2019

A PREDICIÓN DO TEMPO

Vaise achegándo o día do Descenso do Belelle, deixámosvos algúns links e widgets onde podedes consultar a predición meteorolóxica. Anque os servizos públicos como Meteogalicia e AEMET teñen widgets para inscrustar o tempo na web, lamentablemente non dispoñen de versión https o que fai imposible inserilos na web, así que aquí tendes os vínculos:
eltiempo.es
Windy

mércores, 3 de abril de 2019

PECHE DE INSCRICIÓN, HOXE PARA FEDERAD@S DE MONTAÑA


A falta do último conteo xa superamos as 100 inscricións para o XIV Descenso do Belelle... parabéns a tod@s. Hoxe mércores aínda está aberta a inscrición só para as persoas que teñan a tarxeta federativa de Montaña en vigor. Vémonos o sábado 6 de abril en Neda!

luns, 1 de abril de 2019

10 IMPRESCINDIBLES SOBRE O DESCENSO DO BELELLE

1. O DESCENSO DO BELELLE É MOI DIFÍCIL ¿ESTOU PREPARAD@ PARA FACELO?
Esta cuestión é moi persoal, a capacidade para facer a proba, que nós calificamos como de dificultade media e esforzo alto pola súa lonxitude e duración, depende de multitude de variables que dependen tamén da condición física da persoa o día da andaina. Se pensas que non estás en condicións, ou puntualmente non te atopas en condicións ou tes dúbidas, o mellor é que non te apuntes. Con todo, en xeral pódese equiparar por lonxitude e duración cunha etapa do Camiño de Santiago.

2. ¿PODO INSCRIBIRME O DÍA DA PROBA?
Non, os prazos de inscrición que marca a organización non son caprichosos, pois hai que facer unha serie de traballos administrativos e loxísticos previos que levan o seu tempo aos nosos voluntarios, como a xestión dos seguros individuais (imprescindible consignar todos os datos correctamente na solicitude), a contratación do transporte e a compra de bebidas e alimentos para o número de participantes estimado. Se aínda non te inscribiches, faino agora se estás en prazo


3. SON FEDERADO E NON ENTENDO POR QUE ME PEDIDES COPIA DA LICENZA
É imprescindible comprobar que a licenza federativa de montaña e o seguro asociado está en vigor, o único medio que temos para comprobalo é a través da tarxeta federativa.

4. A INSCRICIÓN PARÉCEME UN POUCO CARA
Por sorte ou por desgraza non somos unha administración pública que recada impostos cunha man e ofrece actividades "gratis" coa outra. Somos unha asociación formada por persoas que traballan colectivamente de forma altruista para desenvolver actividades das que participamos (por iso hai descontos para soci@s, que xa soportan co pago das súas cotas o desenvolvemento destas actividades) e que tamén compartimos co resto da sociedade. A participación no Descenso do Belelle conleva custos directos que fan fácil entender por que as cousas custan o que custan: desde o seguro para a actividade de cada participante, ata a contratación dos autobuses de transporte, pasando pola comida, bebida, froita, etc. que fan que na contabilidade final, a celebración deste tipo de actividades resulten deficitarias para o club a pesares das axudas parciais e as doazóns, con todo o custe das cotas de inscrición dos participantes, por alto que poida parecer, non abonda para cubrir os gastos xerados.


5. DESDE ONDE SE SAE?
A saída neutralizada é desde o aparcadoiro do Eroski de Neda (Av. Algeciras), onde deberás presentarte no horario establecido para recoller o dorsal co teu número (que podes comprobar previamente no listado da web ou cando te confirmen a inscrición no club). Desde Neda tomamos os autobuses até a saída en O Gallel (As Pontes).


6. VAI CHOVER? QUE ROUPA LEVO?
Como sempre, o tempo vai ser definitorio á hora de desfrutar do día, nestas últimas semanas de anticiclón a canle do río e o sendeiro fluvial está bastante seco, pero haberá que agardar á evolución dos últimos días para ter unha idea. Lembrade que son zonas de río, e sempre pasaremos por zonas máis ou menos húmidas.

7. TEÑO QUE LEVAR COMIDA E BEBIDA?
A vantaxe de participar nesta andaina organizada é que podes prescindir en parte de cargar con líquidos e sólidos porque cada 7,5 km aproximadamente terás un posto de avituallamento da organización: o primeiro na ponte de Porcar, o segundo no merendeiro do Río Cuberto (ou en Formariz en caso de choiva), e o terceiro no Muíño da Barcia, pasada a Fervenza. Nestes postos atoparás bebidas (auga, bebidas isotónicas) e froita; e no posto do Río Cuberto ao mediodía hai bocatas.

8 QUE PASA SE ME PERDO OU NON ESTOU EN CONDICIÓNS DE SEGUIR?
O percorrido é lineal, seguindo o curso do río na meirande parte do itinerario. Só tes que seguir as marcas azuis e brancas, se estás desorientado podes desandar os teus pasos até a última marca coñecida para tentar volver ao camiño; tamén podes agardar se vén alguén (ao final do percorrido vai un grupo de peche da organización para que non quede ninguén descolgado) e nas zonas de tránsito rodado tamén atoparás aos membros de Protección Civil; tamén tes o teléfono de incidencias escrito na tarxeta do dorsal, ao que podes chamar para solicitar axuda en caso de necesidade.

9. ONDE REMATA A RUTA?
A ruta remata no Centro Cívico Ramón Millarengo, na rúa Xeneral Morgado de Neda, onde recibirás o diploma do club que acredita que tes completado o XIV Descenso do Belelle, ademais nalgúns outros anos o Concello agasallou aos participantes da ruta cun pincho con produtos de panadaría típicos de Neda (bolla, empanadas).

10. GUSTOUME A EXPERIENCIA, QUERO UN RECORDO! PODO REPETIR?
Seguramente os días que seguen ao 6 de abril poderás ver nas redes sociais do club e neste mesmo blog as galerías de fotografías do Descenso, onde poderás buscarte a ti e aos teus amig@s se vides en grupo. Tamén podes deixar os teus comentarios, estaremos encantad@s de lelos. O vindeiro ano, coa XV edición, pecharemos o ciclo dos Descensos a pé do río Belelle tras 15 anos promovendo este roteiro que grazas tamén á marcaxe efectuada polo club poderás facer por libre, enteiro ou por tramos, durante o resto do ano.

SE AÍNDA NON O FIXECHES, PINCHA AQUÍ E INSCRÍBETE XA!

VÉMONOS NO DESCENSO DO BELELLE!

 
 
 
 
 
 

 

 

sábado, 30 de marzo de 2019

PARA VISTAS, TAMÉN O BELELLE

Sabedes que a pouco de tomar a saída do Descenso do Belelle está o Pico Fontardión, un dos cumios máis altos da provincia da Coruña con 665 metros sobre o nivel do mar, na Serra do Forgoselo. As augas dos regos que nacen nestes monte van caer dunha banda na bacía do Eume, e da outra na bacía do Belelle... Se o día acompaña as vistas desde o vértice xeodésico son impresionantes nos 360º como podedes observar nestas visualizacións panorámicas:

...e é que por estas mesmas terras do Fontardión xa pasara Domingo Fontán para elaborar a súa famosa Carta geométrica de Galicia no século XIX... gozade das vistas, e se queredes facelo en vivo, vémonos o 6 de abril!

xoves, 28 de marzo de 2019

BELELLE: SENDEIRISMO E OUTROS DEPORTES

Cunha lonxitude de algo máis de 30 kilómetros, seguramente a canle do río Belelle ofrece máis do que se pode agardar nun río do seu tamaño.

Alén da explotación tradicional das súas augas, para regadío ou consumo; e a súa forza, para mover muíños, machucos, e máis modernamente as turbinas das minicentrais eléctricas, agora nestes tempos contemporáneos da sociedade do ocio e o lecer, hai outras actividades que poden desenvolverse nas súas augas, como o descenso en kaiak ou o barranquismo, como podedes ver nestes interesantes vídeos que tiramos do youtube:






Claro que sempre podes desfrutar de emocións igual de intensas, pero dosificadas ao longo dun percorrido da mesma lonxitude do río, aquí tes a nosa proposta nun vídeo do noso compañeiro Óscar Fernández Otero, que mollouse literalmente para gravar o Descenso do Belelle 2014... dentro vídeo!


mércores, 27 de marzo de 2019

SAÍDA INTERPRETATIVA POLO BELELLE

Sabedes que, ademais de organizar as rutas de medio e longo percorrido no noso calendario anual de actividades no Descenso do Belelle (30K), Costa Ártabra (50K) e Terras de Cedeira (40K), tamén soemos facer outro tipo de actividades máis repousadas nestes mesmos espazos, para destacar os valores naturais, culturais e socioeconómicos desta terra na que vivimos.



Así, este domingo 31 de marzo, tedes ocasión de asistir a  outra edición das nosas saídas interpretativas (o que viñamos chamando as Aulas Verdes) pola contorna do río Belelle. É unha actividade indicada para todas as idades, polo que podedes vir c@s cativ@s para descubrir e aprender unha morea de cousas novas... máis detalles e inscrición na web do club


 (Fotos: Alfonso Manso)

luns, 25 de marzo de 2019

A SAÍDA NO GALLEL

A saída do Descenso do Belelle é no lugar do Gallel, na parroquia de San Pedro de Eume en As Pontes, lugar ata o que chegaremos desde Neda nos autobuses de Autos Paco... É un lugar moi fermoso, só queremos advertirvos que non vos asustedes se vedes algún gran vertebrado 🐲 que non se parece nin a unha vaca nin a un cabalo, que son os que máis abundan pola zona 😀